就嚟到夏天，每逢轉天氣或者空氣差個排自己都會keep住咳，尤其訓練量大嘅時候會咳得比較利害。起初都唔...

就嚟到夏天，每逢轉天氣或者空氣差個排自己都會keep住咳，尤其訓練量大嘅時候會咳得比較利害。起初都唔係點理，諗住係普通氣管敏感，應該唔係咩大問題。

不過原來咳得太耐嘅時候，未必只係簡單嘅氣管敏感，而係有可能係哮喘嘅病徵。哮喘發作時，未必每個人都會有氣促或者呼吸困難等等典型嘅哮喘徵狀。但如果成日咳又當成普通傷風咳而唔理，就有機會因延誤診斷同治療而令到病情惡化。就好似我哋踢波本身有少少拉親啲肌肉又唔去物理治療，最後一定係拉鑊勁而要抖返一兩個月。

傷左都仲有得抖，可以等佢好返，但係哮喘唔理，分分鐘攞你命。輕度哮喘患者平日可能只係耐唔耐有幾聲咳，但係就有機會因為一次嚴重發作而令你後悔無好好打理自己身體。

如果真係患上哮喘，其實都唔洗太過擔心。根據全球哮喘創議組織(GINA)建議哮喘患者使用含吸入式類固醇（ICS）嘅藥物作為治療，例如混合式消炎長效氣管舒張劑，可有效改善氣管「發炎」嘅源頭，防止哮喘發作。反而睇戲常見嘅藍色短效氣管舒張劑 (SABA) 並無消炎藥效，只可以短暫舒緩症狀，濫用反而會增加哮喘發作甚至入院及死亡風險，故此GINA從2019年起巳不再建議單獨使用SABA。

一講類固醇大家都可能一聽就會覺得有好多副作用。但同口服類固醇或針劑相比，吸入式嘅ICS藥物類固醇劑量少得多，主要在肺部產生藥效，對身體其他器官構成影響較少，副作用亦較輕微。

最後好簡單再提吓大家，就算係輕度哮喘患者都應跟足醫生指示用藥同覆診，仲有要避免單獨使用及倚賴SABA，等醫生可以準確檢視病情進展同用藥反應，制定最啱嘅治療方法。

Keep好自己身體，踢好每一場波，好過只係踢到一場波。

#哮喘 #短效氣管舒張劑 #吸入性類固醇

---